ದೇಶದ ರೈತರಿಗೆ ಗುಡ್ ನ್ಯೂಸ್ ; ಪಿಎಂ ಕಿಸಾನ್ ಮೊತ್ತ ಹೆಚ್ಚಳ, ಇನ್ಮುಂದೆ ₹6,000 ಬದಲು ₹10,000 ಸಿಗುತ್ತಾ?

ಕ್ರಿಯೇಟರ್ ಕನ್ನಡ ಡಿಜಿಟಲ್ ಡೆಸ್ಕ್ : ಪ್ರಧಾನ ಮಂತ್ರಿ ಕಿಸಾನ್ ಸಮ್ಮಾನ್ ನಿಧಿ ಯೋಜನೆ (PM Kisan Samman Nidhi Yojana)ಯಿಂದ ಪ್ರಯೋಜನ ಪಡೆಯುತ್ತಿರುವ ಲಕ್ಷಾಂತರ ರೈತರಿಗೆ ಮಹತ್ವದ ಸುದ್ದಿಯೊಂದು ಇಲ್ಲಿದೆ. ಈ ಯೋಜನೆಯಡಿಯಲ್ಲಿ ನೀಡಲಾಗುವ ವಾರ್ಷಿಕ ಆರ್ಥಿಕ ಸಹಾಯವನ್ನ ಹೆಚ್ಚಿಸಲು ಕೇಂದ್ರ ಸರ್ಕಾರ ಪರಿಗಣಿಸುತ್ತಿದೆ ಎಂದು ವರದಿಯಾಗಿದೆ. ಪ್ರಸ್ತುತ, ರೈತರು ವಾರ್ಷಿಕವಾಗಿ ₹6,000 ಪಡೆಯುತ್ತಿದ್ದಾರೆ, ಆದ್ರೆ, ಈ ಮೊತ್ತವನ್ನ ₹10,000ಕ್ಕೆ ಹೆಚ್ಚಿಸುವ ಸಾಧ್ಯತೆಯಿದೆ. ಅಂದ್ಹಾಗೆ, ಈ ಯೋಜನೆಯ ನಿಧಿಯನ್ನ ಹೆಚ್ಚಿಸಬೇಕೆಂದು ರೈತರು ಬಹಳ ಹಿಂದಿನಿಂದಲೂ ಒತ್ತಾಯಿಸುತ್ತಿದ್ದಾರೆ.

ಸರ್ಕಾರದ ಹೈ ಪವರ್ ಪರ್ಚೇಸ್ ಸಮಿತಿಯ ಸದಸ್ಯ ಮತ್ತು ಭಾರತೀಯ ಕೃಷಕ್ ಸಮಾಜದ ರಾಷ್ಟ್ರೀಯ ಅಧ್ಯಕ್ಷರಾದ ಡಾ. ಕೃಷ್ಣವೀರ್ ಚೌಧರಿ ಕೂಡ ಈ ಯೋಜನೆಯ ನಿಧಿಯಲ್ಲಿ ಹೆಚ್ಚಳದ ಬಗ್ಗೆ ಸುಳಿವು ನೀಡಿದ್ದಾರೆ. ಡಾ. ಕೃಷ್ಣವೀರ್ ಚೌಧರಿ ಅವರ ಪ್ರಕಾರ, ಕೇಂದ್ರ ಸರ್ಕಾರವು ಪ್ರಧಾನ ಮಂತ್ರಿ ಕಿಸಾನ್ ಸಮ್ಮಾನ್ ನಿಧಿಯ ಮೊತ್ತವನ್ನ ಹೆಚ್ಚಿಸುವ ಪ್ರಸ್ತಾಪವನ್ನ ಪರಿಗಣಿಸುತ್ತಿದೆ. ರೈತರಿಗೆ ವಾರ್ಷಿಕ ಸಹಾಯವನ್ನು ₹6,000 ರಿಂದ ₹10,000 ಕ್ಕೆ ಹೆಚ್ಚಿಸುವ ಸಾಧ್ಯತೆಯಿದೆ ಎಂದವರು ಹೇಳಿದ್ದಾರೆ ಎಂದು ವರದಿಯಾಗಿದೆ. ನುಹ್ ಪಂಚಾಯತ್ ಭವನದಲ್ಲಿ ನಡೆದ ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡುತ್ತಾ ಅವರು ಈ ಹೇಳಿಕೆ ನೀಡಿದ್ದಾರೆ.

ಆದಾಗ್ಯೂ, ಪಿಎಂ ಕಿಸಾನ್ ನಿಧಿಯ ಮೊತ್ತವನ್ನ ಹೆಚ್ಚಿಸುವ ಬಗ್ಗೆ ಕೇಂದ್ರ ಸರ್ಕಾರವು ಯಾವುದೇ ಅಧಿಕೃತ ಘೋಷಣೆಯನ್ನ ಮಾಡಿಲ್ಲ. ಆದ್ದರಿಂದ, ಇದೀಗ, ₹10,000 ಮೊತ್ತವನ್ನ ಸಂಭಾವ್ಯ ಬದಲಾವಣೆಯಾಗಿ ಮಾತ್ರ ನೋಡಬೇಕು. ಸರ್ಕಾರ ಈ ಪ್ರಸ್ತಾವನೆಯನ್ನ ಅನುಮೋದಿಸಿದರೆ, ರೈತರು ಪ್ರಸ್ತುತ ಮೊತ್ತಕ್ಕಿಂತ ವಾರ್ಷಿಕವಾಗಿ ₹4,000 ಹೆಚ್ಚು ಪಡೆಯುತ್ತಾರೆ. ಇದು ಸಣ್ಣ ಕೃಷಿ ವೆಚ್ಚಗಳನ್ನ ಪೂರೈಸುವಲ್ಲಿ ರೈತರಿಗೆ ಹೆಚ್ಚುವರಿ ಆರ್ಥಿಕ ಸಹಾಯವಾಗಲಿದೆ.