UPI ವಹಿವಾಟು ₹2,000 ಮೀರಿದ್ರೆ ಶುಲ್ಕ, ಬಚಾವ್ ಆಗಲು ಇರುವ ಸರಳ ಮಾರ್ಗಗಳಿವು.! ಅ.15ರಿಂದ ಹೊಸ ರೂಲ್ಸ್

ಕ್ರಿಯೇಟರ್ ಕನ್ನಡ ಡಿಜಿಟಲ್ ಡೆಸ್ಕ್ ; ದೇಶದಲ್ಲಿ ಡಿಜಿಟಲ್ ವಹಿವಾಟುಗಳು ತೀವ್ರವಾಗಿ ಬೆಳೆಯುತ್ತಿರುವುದರಿಂದ, ಅಕ್ಟೋಬರ್ 15 ರಿಂದ ₹2,000 ಕ್ಕಿಂತ ಹೆಚ್ಚಿನ ಯುಪಿಐ ವಹಿವಾಟುಗಳ ಮೇಲೆ ಶೇಕಡಾ 0.4ರಷ್ಟು ಎಂಡಿಆರ್ ಶುಲ್ಕ ಜಾರಿಗೆ ಬರಲಿದೆ.

ಈ ಹೊಸ ನಿಯಂತ್ರಕ ಬದಲಾವಣೆಯು ಸಣ್ಣ ವ್ಯಾಪಾರಿಗಳು ಮತ್ತು ಅಂಗಡಿ ಮಾಲೀಕರಲ್ಲಿ ಹೆಚ್ಚಿನ ಕಳವಳವನ್ನ ಉಂಟುಮಾಡುತ್ತಿದೆ. ಆದಾಗ್ಯೂ, ಸರಿಯಾದ ಅಭ್ಯಾಸಗಳನ್ನು ಅನುಸರಿಸುವ ಮೂಲಕ ಈ ಹೊರೆಯನ್ನು ನಿವಾರಿಸಬಹುದು.

ಕೆಲವು ಸಣ್ಣ ವ್ಯಾಪಾರಿಗಳು MDR ಶುಲ್ಕವನ್ನು ತಪ್ಪಿಸಲು ವ್ಯಾಪಾರಿ ಖಾತೆಯ ಬದಲಿಗೆ ವೈಯಕ್ತಿಕ QR ಕೋಡ್‌ಗಳನ್ನು (P2P) ಬಳಸುತ್ತಿದ್ದಾರೆ. ಆದರೆ ವ್ಯವಹಾರ ವಹಿವಾಟುಗಳನ್ನು ವೈಯಕ್ತಿಕ ವಹಿವಾಟುಗಳಾಗಿ ತೋರಿಸುವುದು ನಿಯಮಗಳ ಉಲ್ಲಂಘನೆಯಾಗಿದೆ. ಹಾಗಾಗಿ, ಬ್ಯಾಂಕುಗಳು ಒದಗಿಸಿದ ಸರಿಯಾದ ವ್ಯಾಪಾರಿ QR ಕೋಡ್‌ಗಳನ್ನು ಬಳಸಿಕೊಂಡು ಕಾನೂನು ಅನುಸರಿಸುವುದು ಸುರಕ್ಷಿತ.

ಇನ್ನು ದೊಡ್ಡ ವಹಿವಾಟುಗಳನ್ನ ಸಣ್ಣ ಭಾಗಗಳಾಗಿ ವಿಭಜಿಸುವುದು ಒಳ್ಳೆಯ ಉಪಾಯವಾದ್ರು, ಅದು ದಂಡಕ್ಕೆ ಕಾರಣವಾಗಬಹುದು. ಇದರ ಬದಲಾಗಿ, ಗ್ರಾಹಕರು ಬ್ಯಾಂಕಿನಿಂದ ಬ್ಯಾಂಕಿಗೆ ನೇರವಾಗಿ ಹಣ ವರ್ಗಾಯಿಸಿದ್ರೆ ಹೆಚ್ಚುವರಿ ಶುಲ್ಕಗಳನ್ನ ತಪ್ಪಿಸಬಹುದು.

ಇನ್ನು ವ್ಯಾಪಾರಿಗಳು ಜಾಣತನ ಪ್ರದರ್ಶಿಸಬೇಕು. ಅನಗತ್ಯವಾಗಿ ದುಬಾರಿ ಪಿಒಎಸ್ ಯಂತ್ರಗಳು ಮತ್ತು ಸೌಂಡ್‌ಬಾಕ್ಸ್‌ಗಳನ್ನು ತಪ್ಪಿಸಿ, ಸರಳವಾದ ಕ್ಯೂಆರ್ ಕೋಡ್‌ಗಳನ್ನು ಬಳಸಬಹುದು. ಇದ್ರಿಂದ ವ್ಯಾಪಾರಿಗಳು ಸಾಧನ ಬಾಡಿಗೆ ಮತ್ತು ಮಾಸಿಕ ನಿರ್ವಹಣಾ ವೆಚ್ಚವನ್ನ ಸುಲಭವಾಗಿ ಉಳಿಸಬಹುದು.

ಸಣ್ಣ ವಹಿವಾಟುಗಳಿಗೆ ‘UPI ಲೈಟ್’ ಬಳಸುವುದರಿಂದ ಬ್ಯಾಂಕಿನ ಸರ್ವರ್ ಮೇಲಿನ ಹೊರೆ ಕಡಿಮೆಯಾಗುತ್ತದೆ ವಹಿವಾಟು ವೇಗವಾಗುತ್ತದೆ. ವ್ಯಾಪಾರಿಗಳು ತಮ್ಮ ಪಾವತಿ ಸೇವಾ ಮಾರ್ಗಸೂಚಿಗಳನ್ನ ಅರ್ಥಮಾಡಿಕೊಂಡು ಪಾಲಿಸಿದರೆ, ಅವರು UPI ಶುಲ್ಕದ ಹೊರೆಯನ್ನ ನಿಯಂತ್ರಿಸಬಹುದು ಮತ್ತು ಅಡೆತಡೆಯಿಲ್ಲದೆ ತಮ್ಮ ವ್ಯವಹಾರವನ್ನ ಮುಂದುವರಿಸಬಹುದು.